أحذرن.......هؤلاء الرجال

[al3sola]

دي بعض الصفات اللي في الرجال لازم تحذري منها والما بتلقى ولا واحدة من الصفات الانا حاقولها دي في اي راجل تتوكل على الله وتعرسو... والبتكتشف اي صفه في اي واحد وهي معرساهو تحاول تقومه, وان ابا الشكيه لله..تقعد معاهو وتتحمل وماجورة باذن الله.. كل شي ولا خراب البيوت...والرجال ديل هم:



الجكاسي
اي كتير الجكيس قبل الزواج.. ودي عادة قلما يتركها اصحابها الا من رحم ربي.. زي دا يخليكي ديمه ايدك فوق قلبك وخايفه يجكس من وراكي, وهو قطعا حيسويها.. واحذري ثم احذري يسمع غنية (راجل المرا حلو حلاة)...



السياسي
دا ما بيعرف يميز بينك وبين جماهير الشعب.. يكضب عليكي ويوعدك ويكضب.. وكل مرة يغشك بطريقه مبتكرة وجديده.. حكمة ربنا انت تصديقيهو وفرحانه كمان.. زي الشعب بالظبط والربط.. يكضب عليكي لحدي ما يموت.. دا لو مل متي انت قبالو..



المراسي
معاقر المريسه ومشتقاتها واخواتها واخوانها.. المراسي دا يجيكي نص الليل شايل معاهو راس خروف وضلافين وينهزك من النوم عشان تقومي تطبخيهن ليهو.. وفيهم نوع يشغل المسجل ويخت شريط بتاع فنان شايقي ويحلف عليكي طلاق علا ترقصي وهو ياخد شبال.. انتي الليل كلو ترقصي وهو ياخد في الشبالات والنيفه بهناك تحرق والشكله تقوم.. وفيهم نوع يجيبوهو ليكي اصحابو نص الليل نايم كل يوم ايام الله السبعه.. والغريبه امك تسعلك ما بقيتو تلاته؟!.. وهي مسكينه ما عارفه انكم قربتو تبقو واحد..



الشنّاف
كتير الشناف... اي حاجه يطلع فيها غلط.. ويشل حال اي حاجه واي زول يقع تحت يدو.. حتى كديستكم الفي البيت ما بتمرق من شيل حالو.. لازميطلع فيها شي.. ومرة مرة انتي زاتك يديكي حقك..


العوّاف
دا يعاف اي شي.. اي حاجه تسويها ليهو ما يكلها ولو مشي معاكي بيت نس ابوكي وعندك اخوان صغار وخاصه النوع الديمه عندو نزله.. وللاعندك حبوبتك كبيرة ولا جدك كبير يا يدخل اي حاجه في خشمو. طول ماهو قاعد عندهم يكون عايف اخوانك وجدك وحبوبتك.. ويدخلك في ضفورك ويخليكي تكوسي للاعذار ليهو..



الخوّاف
اول معرفتك بيهو يعمل فيها عنتر بن شداد.. ويقعد يحكي ليك ويكلمك ببطولاتو مع كلاب الحله والحراميه والرباطين.. وكيف كان بيدقهم.. لكن بعدين حتكتشفي انو اخوف زول في في الدنيا.. ونضمو دا نضم فاضي ساكت.. اول ما يسمع انو في حرامي متلح الحله حقتكم يقوليك: (النعمه؟!.. ما مشتهيه ناس ابوكي نمشي ناخد معاهم يومين تلاته؟..) هروبا من الحرامي.. وان شاء الله البيت يسرقوهو كلو..



الشكاي
الجنو شكيه.. خصوصا من المعايش.. تلقيهو هامي ويزيدك هم وغم.. ويقعد يشكي ليل نهار من الماهيه الما مكفياهو ومن مديرو في الشغل الحاقر بيهو.. ومن جيرانو القاعدين يخلو كيس الوسخ حقهم قدام خشم بابكم.. ويمرق برا البيت ويقعد يشتكي منك انت زااااتك...



الحاكاي
من يحاكي خلق الله.. فعلا وقولا.. وسلوكا.. ودا حيقعد كل ما يزعل منك او اتشاكلتو يحاكيكي..يمرق سنونو برا ويعوج خشمو ويقوليك (يا سلام عليك يا خوي...) زي ما بتقوليها انتي.. لحدي ما يفقدك الثقه في جمالك..



الكاواي
يستمتع بالمكاواة.. تقولي ليهو ما تبصق السفه في السراميك.. يسوي السعوط شغله يقعد يسف ويبصق اليوم كلو فوق السراميك عشان يكاويكي ويغيظك.. ولو ما كاواكي يقعد اليوم كلو زهجان...



اللعلاع
احب الصوت الجهوري.. بالرغم من حلقومو الكبير وكواريكو.. لكين هرشه..لو صريتو ليهو صره صغيرونه بيسكت طوالي.. المصيبه انو بسرعه بينسى الصرة ويرجع تاني يلعلع.. بعدين ونستو كلها باعلى صوتو يعني ما عندكم سر.. سركم كلو عند الجيران..



البرطاع
من يمشي وهو يبرطع.. تسمعي حس نعالاتو من اول الشارع.. يحب يلبس الشباشب والسفنجات.. كادوات قويه للبرطعه.. يمتاز بكرعين متشققات, تخان, خرش.. نص مزانيتكم حتروح نعلات..



الطماع
قحف..قيحه.. اي حاجه عندو بالحساب ..من الصابونه............لحدي طراقات الكسرة يعدهن طرقة طرقة.. وحتى القطر بتاع الطرقة يعبرو..



حكاوي (سي جي مان)
عن جريدة سوداني ..

[lolitta]

معاكي حق اختي لكن كده خليتي منو :biggrin:
يعني كده لازم نحذر من الرجال كلهم .....شكرا عسوله على الموضوع :signthankspin:

[al3sola]

معاكي حق اختي لكن كده خليتي منو :biggrin:
يعني كده لازم نحذر من الرجال كلهم .....شكرا عسوله على الموضوع :signthankspin:



المفروض كدا..
وتسلمي على الرد..

[المستبدة]

عسوله والله بالغتي عديل كدا
موضوع عجييييييييييييييييييب

كدا على قول لوليتا ما فضل واحد نافع

لكن بيني وبينك كدا احسن لينا برضو

ما عايزنهم كدا احنا بنكون مرتاحين اكتر

[al3sola]

عسوله والله بالغتي عديل كدا
موضوع عجييييييييييييييييييب

كدا على قول لوليتا ما فضل واحد نافع

لكن بيني وبينك كدا احسن لينا برضو

ما عايزنهم كدا احنا بنكون مرتاحين اكتر


على قولك دايرين شنو بوجع الراس..

[فجـــأه]

يا اخواتنا العسل كده ما عرفنا المشرفين عيوبم شنو :biggrin:

لكن يالوليتا الأصابع مابتتشابه عشان تقولي مافي راجل الا والصفات دي فيو .........

والمستبده ياست الزوق شنو الكلام ده ياعسل :wat:

والاخت العسولة ياعسل شكرا على الموضوع :rolleyes:

[المستقل]

ههههههههههههههههههههههههههههههههههه
انتو عارفين الغريب شنو ..
نحن الرجال المفروض نقوول كدة
بنات مين الزمن دة
هوا بقا فى بنات
حتكلم عن السياسة شوية
انتو عارفين من اكتر الحاجات التاعبة الاولاد شنو فى الحب
المغترب
البت تكون بتحب فى الولد يجى مغترب من هنا بيحسم الموضوع فى ثااانية بس يا انتى
وبعد دة عايزاانة نحب ؟؟؟؟
والغريب انتو بخافو مننا ههههههههههههههههه
حلوة لكن
هسه انا بفكر انو نعمل منتدى بتاع عزاابة بس
مادايرين مع البنات نحن ؟؟؟ والمؤيدنى يجينى بس ....
المقاطعة لجميع النساء بما فيهم حبيبتى التى تسكن فى أعالى النيل

[al3sola]

فجأه, المستقل تسلمو على الردود..
والمستقل انا اظن انتو ما حتقدرو على موضوع العزابه ده وأول زول حيبوضو انت..!!

[ود الجاك]

صعبتيهاااااااااااااااااااااااااااااااااااااااااااا اا
لاكين اقول ليك شى بتلفو وتجو يا العسوله :dkb:

[al3sola]

صعبتيهاااااااااااااااااااااااااااااااااااااااااااا اا
لاكين اقول ليك شى بتلفو وتجو يا العسوله :dkb:



نحن برضو؟؟؟؟ :dkb:

[قارئة الفنجان]

العسوله خوفتينا عديييييييييييييييييل كده
بس حرام ماكلهم بالصفات دي

والدنيا مابتبقي بلاهم